Stökk risarækju tacos með spæsí hunangs-límónusalati tajin ananas og hvítlaukssósu

Þessi rækju taco uppskrift sameinar stökka risarækjur, spæsí hunangs–límónu rauðkálssalat, lárperu, hvítlaukssósu og grillaðan tajín ananas. Fullkomið jafnvægi af sætu, súru og krydduðu bragði í hverjum bita – einföld og fersk máltíð sem slær í gegn í sumarboði eða hvernig sem viðrar.

Fyrir 2:

300 g risarækjur

60 g hveiti

1 msk maíssterkja

1 tsk paprikuduft

½ tsk cayenne pipar eða chipotle

1 tsk hvítlauksduft

½ tsk laukduft

Salt eftir smekk

2 hringir af ananas

1 tsk tajin

Spæsí hunangs-límónu rauðkálssalat

6 stk litlar tortillur

1 stk lárpera í sneiðum

50 ml sýrður rjómi (18%)

50 ml majónes

¼ hvítlaukur

Límónubörkur og safi eftir smekk

1. Gerið spæsí hunangs-límónu rauðkálssalat.

2. Rífið hvítlauk saman við majónes og sýrðan rjóma. Rífið smá límónubörk saman við og smakkið sósuna til með salti og límónusafa.

3. Þurrkið rækjurnar vel með eldhúspappír – það hjálpar hjúpnum að loða betur við og gera þær stökkar.

4. Blandið saman hveiti, maíssterkju, paprikudufti, cayenne eða chipotle, hvítlauksdufti og laukdufti í skál. Smakkið til með salti.

5. Veltið rækjunum upp úr krydduðu hveitinu þar til þær eru jafnt hjúpaðar. Hristið af umfram hveiti.

6. Hitið botnfylli af hitaþolinni olíu á stórri pönnu við miðlungsháan hita. Þegar olían er orðin heit (þú getur prófað með smá hveiti eða tannstöngli– ef það freyðir er hún tilbúin) setjið rækjurnar á pönnuna.

7. Steikið í 1–2 mínútur á hvorri hlið þar til rækjurnar eru gullinbrúnar og stökkar. Setjið á eldhúspappír til að losna við umfram olíu.

8. Steikið tortillur á annari heitri pönnu í stutta stund á hvorri hlið þar til heitar og mjúkar. Vefjið inn í hreint eldhússtykki til að halda vefjunum heitum og mjúkum.

9. Steikið ananas á heitri pönnu (eða grillið ananasinn. Það er best!). Skerið í bita og blandið saman við tajin.

10. Smyrjið vefjurnar með hvítlaukssósu og fyllið svo með salati, rækjum, lárperu og tajin ananas. Toppið með uppáhalds hot sósunni ykkar.