Ómótstæðileg súrdeigspizza með ítalskri salsiccia pylsu, rósmarín og chilihunangi sem tekur pizzuna upp á næsta stig!
Mér þykir þessi bragðsamsetning svo afskaplega ljúffeng og haustleg sem á vel við þessa dagana þegar laufin eru farin að skipta um lit og sólin farin að heilsa minna upp á okkur.
Hvað er þá betra en að gera vel við sig með rjúkandi góðri pizzu og glasi af rauðu?
Fyrir 4:
Súrdeigs pizzadeig, 2x 300 g / T.d. Frá Brikk Bakarí
Salsiccia grillpylsa, 200 g / Fæst frosin frá Tariello í Hagkaup, Krónunni og Melabúðinni
Pizzasósa, 200 ml
Mozzarella rifinn, 250 g
Rauðlaukur, 1 lítill
Rósmarín ferskt, 1 stilkur
Klettasalat, 25 g
Parmesan, eftir smekk
Chilihunang, eftir smekk (Uppskrift hér)
Takið pizzadeigið úr kæli 2 klst fyrir eldun.
Skerið utan af salsiccia pylsunum og losið kjötið í sundur. Steikið á heitri pönnu þar til kjötið er fulleldað. Geymið á disk til hliðar
Stillið ofninn á hæsta hita (á pizzastillingu ef það er í boði).
Sneiðið rauðlauk í þunnar sneiðar eftir smekk. Saxið rósmarín gróflega.
Setjið bökunarplötu inn í ofn svo hún hitni vel á meðan unnið er í botninum. Hafið bökunarpappír kláran til að leggja deigið á.
Setjið smá hveiti á hendurnar og notið hendurnar til þess að fletja botninn út í um 28 cm hring. Best er að vinna út frá miðju deigsins í átt að kantinum og reyna að hlífa um 2 cm af kantinum við sem mestu hnjaski. Þannig er gasinu í deiginu ýtt út í kantinn sem verður til þess að hann lyftist betur.
Raðið sósu, salsiccia, osti, rósmarín og rauðlauk á pizzuna.
Takið heita ofnplötuna úr ofninum (farið varlega) og dragið pizzzuna á ofnpappírnum á heita plötuna. Bakið í neðstu grind í ofni í 12-15 mín eða þar til pizzan er orðin fallega gyllt.
Toppið pizzuna með klettasalati, rifnum parmesan og chilihunangi eftir smekk.