Ef þú ert í stuði fyrir örlítið öðruvísi pizzu þá er þessi hér klárlega málið!
Humarinn og smokey chorizo bragðið parast svakalega vel á móti sætunni í ananasinum (passið að velja góðan ananas!) og hitanum frá spicy majóinu og chiliflögunum.
Ég dæmi engann fyrir að nota aðkeypta pizzabotna en ef þú ert í stuði fyrir að gera pizzadeigið frá grunni þá mæli ég með þessari uppskrift hér.
Pizzabotn, 400 g / Eða uppáhalds pizzadeigs uppskriftin þín (t.d. þessi)
Skelflettur humar, 100 g
Spicy chorizo, 60 g
Mozzarellaostur, 150 g
Hvítlaukur, 1 rif
Pizzasósa, 150 ml / Mér þykir Mutti best
Basilíka, 6 g
Ananasbitar, 50 g / Mér þykja Dole gold bestir
Japanskt majónes, 50 ml
Srirachasósa, 10 ml
Chiliflögur, 5 ml
Takið pizzabotninn úr kæli amk 1 klst áður en elda á pizzuna.
Setjið pizzastein í neðstu grind í ofni og stillið á hæsta hita (300°C helst). Látið steininn hitna á meðan unnið er í öðru.
Hrærið srirachasósu saman við japanskt majónes.
Þerrið humarinn og hreinsið dökku röndina sem liggur endilagt yfir humarinn úr ef þarf. Hitið smá olíu á pönnu við háan hita. Bætið humarhölum út á pönnuna, pressið hvítlauk og setjið á pönnuna ásamt smjörklípu. Steikið humarinn í um 2 mín eða þar til hann er fulleldaður. Saltið smá.
Notið hendurnar til þess að fletja pizzabotninn út í um 15“ hring og leggið svo á bökunarpappír. Best er að vinna út frá miðju deigsins í átt að kantinum og reyna að hlífa um 1,5 cm af kantinum við sem mestu hnjaski, en þannig er gasinu ýtt út í kantinn sem verður til þess að hann lyftist mun betur.
Skerið chorizo í fernt. Smyrjið pizzasósu yfir botninn og dreifið mozzarellaosti svo yfir. Raðið humri, chorizo, ananas og chiliflögum á pizzuna.
Færið pizzuna á pizzasteininn og bakið þar til pizzan er fallega gyllt og ljúffeng.
Saxið basilíku og stráið yfir pizzuna ásamt spicy majó þegar hún kemur úr ofninum.
