Ljúffengt rjómalagað kjúklingapasta með pestó, rjómaosti, fullt af parmesan og svo toppað með ristuðum pankó raspi sem gerir það mjög skemmtilegt undir tönn.
Þessi uppskrift er búin að slá í gegn aftur og aftur hérna í Laugardalnum og er orðinn fastur gestur á matseðlinum, enda kjörið helgarpasta!
Að bæta við allt að 2 dl af pastavatni hljómar kannski eins og sósan verði allt of þunn en galdurinn er að láta hana sjóða í aðeins og þá veldur sterkjan sem situr eftir í vatninu frá pastanu því að sósan þykkist passlega og þekur pastað vel.
Fyrir 2-3:
Kjúklingabringur, 2 stk (sirka 350 g)
Gnocchi pasta, 180 g
Laukur, 120 g
Hvítlauksrif, 1 stk
Roasted red pepper pestó frá Sacla, Hálf krukka (95 g)
Tómatpúrra, 30 ml
Rjómi, 100 ml
Rjómaostur, 50 g
Pankó brauðraspur, 20 g
Kjúklingakraftur (duft), 5 ml
Kjötkraftur (duft), 2,5 ml
Ítalskt pastakrydd (Pottagaldrar), 10 ml
Parmesan ostur, 30 g + aðeins meira í lokin ofan á réttinn að sjálfsögðu
Spínat, 50 g
Basil, 5 g
Ristið pankó brauðraspinn á heitri pönnu þar til hann er fallega gylltur.
Sjóðið pasta eftir leiðbeiningum á pakka en takið frá 2 dl af pastavatni áður en vatnið er sigtað frá pastanu.
Skerið kjúklingabringurnar í munnbitastærðir. Hitið olíu á pönnu og steikið kjúklinginn þar til hann er fulleldaður. Setjið á disk og geymið til hliðar.
Saxið lauk og steikið á pönnu við miðlungshita þar til hann er glær og mjúkur. Pressið hvítlauksrif út á pönnuna og steikið í um 1 mín. Bætið næst tómatpúrru og pestó út á pönnuna og steikið í 1 mín. Bætið rjóma, rjómaosti, kjúklingakrafti, kjötkrafti og ítölsku pastakryddi út á pönnuna og látið malla í nokkrar mín.
Hækkið hitann og bætið pastavatninu sem tekið var til hliðar út á pönnuna í nokkrum skömmtum, hrærið vel á milli og látið malla þar til sósan þykkist hæfilega.
Lækkið hitann í lága stillingu, bætið kjúklingnum út á pönnuna ásamt spínati og hrærið þar til spínatið er búið að mýkjast. Smakkið til með salti og pipar.
Bætið pastanu út á pönnuna, saxið basil og rífið parmesan og hrærið saman við réttinn.
Toppið réttinn með ristuðum pankó raspi og parmesan og berið fram með fersku salati til hliðar.