9 ráð fyrir hina fullkomnu steik

Það er fátt betra en góð steik sem er fallega brúnuð, safarík og rauð í miðjunni.


Að steikja sér safaríka og fallega steik á pönnu er eitthvað sem allir þurfa að kunna en getur verið smá kúnst. Steikingartíminn er vissulega einn mikilvægasti þátturinn og hann getur verið margbreytilegur eftir þykkt kjötsins, en það eru nokkrir aðrir hlutir sem er vert að hafa í huga þegar maður ætlar að gera vel við sig og sína með góðri steik. Hér fer ég yfir nokkur atriði sem mér þykir mikilvæg og held að munu hjálpa þér að negla næstu steik!

  1. Veldu fallega fitusprengt kjöt, þessi fita mun sjá til þess að steikin þín sé safarík og ljúffeng.

  2. Taktu kjötið úr kæli a.m.k. 60 mín áður en þú ætlar að elda það. Ef kjötið er of kalt þegar það fer á pönnuna muntu enda með kjöt sem er ofeldað að utan áður en það hefur náð réttu kjarnhitastigi.

  3. Þerraðu kjötið með eldhúspappír rétt áður en þú ætlar að setja það á pönnuna. Því minni vökvi sem er utan á kjötinu því auðveldara er að brúna kjötið.

  4. Nuddaðu kjötið með góðri hitaþolinni olíu (ég nota Avocado olíu) og saltaðu kjötið rausnarlega áður en þú setur það út á pönnuna. Ég bíð oftast með að pipra kjötið þar til eftir steikingu nema ég sé að nota grænan pipar, þá salta ég og pipra fyrir steikingu, það er þó smekksatriði.

  5. Notaðu stálpönnu! Stálpönnur halda hita betur en teflon pönnur og eru því kjörnar í að brúna kjöt. Settu pönnuna á háan hita og bíddu þar til það fer aðeins að rjúka úr henni, bættu þá 1 msk af hitaþolinni olíu út á pönnuna og því næst steikunum.

  6. Snúðu kjötinu! Ekki vera hræd/d við að snúa kjötinu nokkrum sinnum yfir eldunartímann, sérstaklega ef þú ert með stóran bita. Það hjálpar til með jafnari eldun. Ég Læt steikurnar venjulega liggja óhreyfðar í 2-2,5 mín á hvorri hlið en eftir það sný ég þeim reglulega.

  7. Notið kjöthitamæli. Þangað til þú ert komin/n með tilfinningu fyrir hversu langan tíma misþykkir bitar af kjöti taka í eldun þá er kjöthitamælir ein besta fjárfesting sem völ er á og tekur allt stress frá því að elda þykka og dýra steik. 50C er rare, 55C er medium rare, 60C er medium, 65C er medium well.

  8. Smjör, hvítlaukur og kryddjurtir. Þegar um 1-2 mín eru eftir af eldunartíma kjötsins þá er kjörið að bæta smjörklípu, hvítlauksrifi og kryddjurtum (t.d. rósmarín og/eða timían) út á pönnuna og dreypa bræddu smjörinu yfir steikurnar á milli þess sem þeim er snúið reglulega. Þetta hjálpar til við að brúna kjötið enn betur og kryddjurtirnar og hvítlaukurinn gefa ljúffengt bragð.

  9. Hvílið kjötið! Það að hvíla kjötið í 5-10 mín eftir eldun er mjög mikilvægt skref. Þá fær safinn úr steikinni tíma til þess að dreifa sér aftur um steikina sem verður til þess að hver biti verður safaríkur. Ef steikin er skorin of snemma mun safinn leka úr henni og það vill enginn!