Það hefur eflaust ekki farið framhjá neinum matgæðingum að nú er fáanlegur íslenskur Burrata ostur. Því fannst mér alveg kjörið að setja í eins og eina ljúffenga föstudagspizzu þar sem hráefnin fá að njóta sín.
Að gera sína eigin pizzasósu frá grunni þykir mér alltaf skila sér í bragði en að sjálfsögðu má líka nota sína uppáhalds tilbúnu sósu.
San Marzano tómatar, 1 dós
Hvítlauksrif, 2 stk
Ólífuolía, 1 msk
Flögusalt, 0,5 tsk
Hunang 1 tsk
Timiangreinar, 5 stk
Pizzadeig, 1 kúla
Burrata ostur, 1 kúla
Góð Parma skinka, 6 sneiðar
Basilíka fersk, handfylli af laufum
Parmesanostur eftir smekk
Rauðar chiliflögur eftir smekk
Maukið tómatana í nokkrum stuttum slögum með töfrasprota.
Hitið 1 msk af ólífuolíu við vægan hita í litlum potti og pressið hvítlauk út í. Steikið hvítlaukinn við vægan hita þar til hann byrjar að ilma. Bætið tómötum, flögusalti, hunangi og timíangreinum út í pottinn og látið malla í 15 mín eða þar til sósan fer að þykkjast aðeins. Smakkið til með salti og látið kólna. Fjarlægið timiangreinar áður en sósan er notuð.
Hitið ofn í hæsta hita sem ofninn ræður við með yfir og undir hita.
Setjið pizzastein í næst neðstu grind í ofni og látið hitna í 30 mín með ofninum. Ef pizzasteinn er ekki til er gott að hita ofnplötuna í staðin.
Notið hendurnar til þess að fletja botninn út í um 12-14” hring. Best er að vinna út frá miðju deigsins í átt að kantinum og reyna að hlífa um 1,5-2 cm af kantinum við sem mestu hnjaski, en þannig er gasinu sem hefur myndast í deginu ýtt út í kantinn sem verður til þess að hann lyftist mun betur.
Komið pizzabotninum fyrir á bökunarpappír. Dreifið sósu yfir botninn og rífið Burrata ostinn yfir. Stráið chiliflögum eftir smekk yfir pizzuna.
Dragið pizzuna á bökunarpappírnum á pizzasteininn/bökunarplötuna og bakið þar til pizzan er fallega gyllt og osturinn bráðnaður. Milli 6-10 mín (fer eftir hitanum á ofninum og hvort pizzasteinn sé notaður).
Dreifið parma skinku og basilíku yfir pizzuna þegar hún kemur úr ofninum og rífið parmesan ost yfir.
Þessi færsla er unnin í samstarfi við Vínnes ehf
Comments