Hér koma sama tveir af mínum uppáhalds hlutum. Gulrótarkökur og kleinuhringir!
Þetta eru mjúkir og ljúffengir bakaðir kleinuhringir með pekanhnetum, vermandi kryddum og ómótstæðilegu Philadelphia rjómaostakremi. Tekur enga stund að setja saman og smellpassar með kaffinu!
Gerir um 20 kleinuhringi:
Hveiti, 160 g
Matarsódi, ¾ tsk
Lyftiduft, ½ tsk
Borðsalt, ½ tsk
Kanill, 1 tsk
Múskat, ¼ tsk
Engiferduft, ¾ tsk
Negull, ¼ tsk
Sykur, 100 g
Púðursykur, 100 g
Repjuolía, 180 ml
Egg, 2 stk
Vanillustöng, 1 stk
Nýmjólk, 2 msk
Rifnar gulrætur, 170 g
Pekanhnetur, 70 g + meira í skraut
Philadelphia rjómaostur, 150 g
Flórsykur, 2 dl
Rjómi, 3-5 msk
Forhitið ofn í 175°C með yfir og undirhita
Pískið saman hveiti, matarsóda, lyftiduft, salt, kryddin, sykur og púðursykur í stórri skál.
Bætið olíunni út í skálina og hrærið saman með handþeytara. Bætið 1 eggi í einu út í og blandið vel saman. Skerið vanillustöngina í tvennt og skafið fræin innan úr. Bætið fræjunum út í skálina ásamt mjólkinni og hrærið vel saman.
Saxið pekanhnetur og bætið út í skálina ásamt gulrótum og blandið vel saman með sleikju.
Spreyið kleinuhringjaform (fást t.d. í Hagkaup eða Allt í köku) með matarolíu og fyllið hvert mót hálfa leið upp.
Bakið í miðjum ofni í 15 mín. Látið kólna smá áður en kleinuhringirnir eru fjarlægðir úr forminu.
Hrærið saman rjómaost og flórsykur með handþeytara. Bætið við rjóma þar til áferðin er orðin hentug til að dýfa kleinuhringjunum í eða smyrja kreminu á þá.
Saxið pekahnhnetur eða hvað sem ykkur listir og skreytið kleinuhringina.
Þessi færsla er unnin í samstarfi með Innnes ehf.
