Graskerskleinuhringir

Nú þegar haustið er í fullu gangi þá er ekkert betra en ilmandi kryddaðir graskerskleinuhringir hjúpaðir kanilsykri.

Undirstaðan í þessari uppskrift er hreint graskersmauk frá Libby´s en með haustinu ratar það í búðirnar og þegar þessi færsla er skrifuð fæst það í Costco, en annars er Melabúðin, Hagkaup eða Fjarðarkaup vænlegast til vinnings.

Í stað þess að djúpsteikja þessa kleinuhringi þá eru þeir bakaðir í ofni í sérstöku kleinuhringjaformi sem fæst í Allt í köku en ég hef líka séð það til í Hagkaup.

Þessi uppskrift gerir 22-24 kleinuhringi.

Grænmetisolía, 100 g

Egg, 3 stk

Sykur, 250 g

Hlynsýróp, 3 msk

Graskersmauk, 340 g

Kanill, 1 tsk

Engiferduft, 1/4 tsk

Múskat, 1/4 tsk

Salt, 1,5 tsk

Lyftiduft, 1,5 tsk

Hveiti, 230 g

---

1. Forhitið ofn í 170°C með yfir og undirhita.

2. Hrærið saman öll hráefnin fyrir utan hveiti með handþeytara þar til allt hefur samlagast.

3. Hrærið hveitinu saman þar til það hefur samlagast blautblöndunni. Varist að ofhræra blönduna með hveitinu.

4. Smyrjið kleinuhringaformin með olíu svo kleinurhingirnir losni auðveldar úr formunum.

5. Fyllið mótin sirka 3/4 leið upp af deigi og bakið í miðjum ofni í 15 mín eða þar til tannstöngull kemur hreinn úr miðju kleinuhringjanna. Látið kólna í nokkrar mín og losið þá úr formunum.

6. Veltið upp úr kanilsykri og berið fram strax eða hyljið með hreinu eldhússtykki þar til skömmu áður en bera á fram og veltið þá upp úr kanilsykri.